நீங்கள் தேடியது "மக்கள் தவிப்பு"

தஞ்சாவூர்:

நாகை மாவட்டம் வேதாரண்யம் அருகே கடந்த 16-ந்தேதி கஜா புயல் கரையை கடந்தது. இதையொட்டி பலத்த காற்று வீசியது.

இதில் டெல்டா மாவட்டங்களான தஞ்சை, திருவாரூர், நாகை மாவட்டங்களில் கடும் பாதிப்பு ஏற்பட்டது. ஆயிரக்கணக்கான மரங்கள், மின்கம்பங்கள் முறிந்து விழுந்தன. மேலும் வீடுகள் இடிந்து பலர் பலியாகினர். இதைத்தொடர்ந்து மீட்பு பணிகள் போர்கால அடிப்படையில் மேற்கொள்ளப்பட்டு சில இடங்களில் மின் இணைப்பு கொடுக்கப்பட்டது. இருந்த போதிலும் முகாம்களில் பல்லாயிரக்கணக்கானோர் தஞ்சமடைந்து உள்ளனர். அவர்களுக்கு உணவு, உடை உள்ளிட்ட வசதிகள் செய்து கொடுக்கப்பட்டுள்ளது.

மீட்பு பணிகள் மும்முரமாக மேற்கொள்ளப்பட்டு வந்த நிலையில் மீண்டும் வானிலை மையம் மழை எச்சரிக்கை விடுத்தது.

அதன்படி கடந்த 3 நாட்களாக டெல்டா மாவட்டங்களில் தொடர் மழை பெய்து வருகிறது. நேற்று காலை முதல் விடிய விடிய பலத்த மழை பெய்ததால் புயல் சேதத்தால் பாதிக்கப்பட்ட பகுதிகள் மீள முடியாத நிலையை அடைந்துள்ளன. இதனால் மக்களின் இயல்பு வாழ்க்கை கேள்வி குறியாகிவிட்டது. இதில் இருந்து அவர்கள் மீள இன்றும் பல நாட்களாகும் அவல நிலை உருவாகி உள்ளது.



வேதாரண்யம் வேதாரண்யேஸ்வரர் கோவில், திருவாரூர் தியாகராஜ சுவாமி கோவில், தஞ்சை மாவட்டம் கும்பகோணத்தை அடுத்த தாரசுரத்தில் உள்ள ஐராவதீஸ்வரர் கோவில் உள்பட பல கோவில்களிலும் மழைநீர் புகுந்து குளம்போல் தேங்கி உள்ளது. மின் இணைப்பு கொடுக்கப்பட்டுள்ள இடங்களில் மழையால் மின் விபத்து ஏற்படும் அபாயமும் நிலவுகிறது.

நாகை மாவட்டம் கோடியக்காட்டில் உள்ள வன விலங்கு சரணாலயம் புயல் மற்றும் மழையால் உரு குலைந்து போய் விட்டது. அங்கு வசித்து மான்கள், குரங்குகள் உள்ளிட்ட விலங்குகள் பல உயிரிழந்து விட்டன. இதனால் அங்கு நோய் பரவும் அச்சமும் ஏற்பட்டுள்ளது.

நாகை மாவட்டத்தை பொறுத்தவரை மீன்பிடித் தொழில் பிரதானமானது. அங்கு புயல் மற்றும் மழையால் 2 ஆயிரத்துக்கும் மேற்பட்ட படகுகள் சேதமாகி விட்டன. இதனால் பல கோடி நஷ்டம் ஏற்பட்டு மீனவர்கள் தங்களது வாழ்வாதாரத்தை இழந்துள்ளனர். நாகை, வேதாரண்யம், ஆறுகாட்டுத்துறை, வெள்ளப்பள்ளம், பூம்புகார், தரங்கம்பாடி, புதுபட்டினம் உள்ளிட்ட பல மீனவ கிராமங்களில் ஏராளமான வீடுகள் மழையில் சேதமாகி விட்டன. அவர்கள் தங்கள் வீடுகளை இழந்து தவிக்கின்றனர்.

இதேபோல் தஞ்சை, திருவாரூர் மாவட்டங்களில் ஓட்டு வீடு மறியல் மற்றும் குடிசை வீடுகளில் பெரும்பாலான மக்கள் வசித்து வந்தனர். அவர்கள் வீடு புயல் மற்றும் மழையால் சீரமைக்க முடியாத அளவுக்கு சேதமாகி விட்டது. பாதுகாப்பு முகாம் வசதி குறைவாக உள்ளதால் மக்கள் சேதமான வீடுகளில் தங்கும் சூழ்நிலை நிலவுவதால் அவர்களின் உயிருக்கு உத்தரவாதமில்லை. தொழிலாளர்கள் எந்த வேலைக்கும் செல்ல முடியாமல் வீடுகளில் முடங்கி உள்ளனர். மாணவ-மாணவிகள் புத்தகம், நோட்டு சேதமாகி விட்டதால் பள்ளிக்கு சென்று மீண்டும் படிப்பதில் சிக்கல் ஏற்பட்டுள்ளது. மழையில் பல பள்ளி கட்டிடங்களும் சேதமாகி விட்டன. எனவே மழை நின்ற பின்னரும் அந்த பள்ளிகளில் சென்று படிக்க முடியாத நிலை ஏற்பட்டுள்ளது.

திருவாரூர் மாவட்டத்தில் திருவாரூர், மன்னார்குடி, திருத்துறைப்பூண்டி, முத்துப்பேட்டை, வலங்கைமான், நீடாமங்கலம், பேரளம், குடவாசல் உள்ளிட்ட பகுதிகளில் கனமழை பெய்துவருகிறது. இதனால் அந்த பகுதிகளில் சம்பா பயிர்கள் தண்ணீரில் மூழ்கி உள்ளது. தொடர்ந்து மழை பெய்து வருவதால் விவசாயி அச்சத்தில் உள்ளனர்.

டெல்டா மாவட்டங்களில் புயல் மழைக்கு பல லட்சம் தென்னை மரங்கள், வாழைகள், கரும்பு, நெல் உள்ளிட்ட பயிர்களும் கடும் சேதத்தை சந்தித்துள்ளன. அரசு நிவாரண பொருட்களை வழங்கிவரும் நிலையில் அவைகளை சென்று வாங்க முடியாத அளவுக்கு மழை பெய்து வருகிறது.

பட்டுக்கோட்டையில் 9 நாட்களாக மின்சாரம் இல்லாததால் 200-க்கும் மேற்பட்ட கிராமங்கள் இருளில் மூழ்கி உள்ளன. இதற்கிடையே தொடர்மழை பெய்து குளம்போல் தண்ணீர் தேங்கி நிற்பதால் குடைபிடித்து கொண்டு மக்கள் சாப்பிடும் நிலை ஏற்பட்டது. பல குடும்பத்தினர் தூங்க இடமின்றி தவித்து வருகின்றனர்.

டெல்டா மாவட்டங்களில் மீட்பு பணிகளை மழை முடங்கி விட்டதால் நிலைமை எப்போது சீராகுமா? என்று மக்கள் கவலையில் ஆழ்ந்துள்ளனர். இந்த நிலையில் புயலில் சேதம் அடைந்த வீடுகளுக்கு அரசு 5 லட்சம் தார்ப்பாய்களை வழங்க நடவடிக்கை எடுத்து வருகிறது.

டெல்டா மாவட்டங்களில் நேற்று காலை முதல் இன்னும் தொடர் மழை பெய்து வருகிறது. இது மக்களை மேலும் அச்சமடைய வைத்துள்ளது. எங்களுக்கு இயற்கை மறுவாழ்வு வழங்கவிடுமா? விடாதா? என்று வேதனை அடைந்துள்ளனர். மழை நிற்காதவரை மீட்பு பணிகள் முழுமை பெறாது. இந்த பிரச்சினைக்கு தீர்வு இயற்கையின் கையில் உள்ளது.

டெல்டா மாவட்டங்களில் நேற்று காலை முதல் இன்று காலை 8 மணி வரை பெய்துள்ள மழை அளவு மில்லி மீட்டரில் வருமாறு:-

நன்னிலம்- 197.3
திருவாரூர்- 173.7
நீடாமங்களம்- 152.8
கும்பகோணம்- 147.3
குடவாசல்- 136.2
மன்னார்குடி- 114.2
மதுக்கூர்-102.4
நெய்வாசல்- 98.8
திருத்துறைப்பூண்டி- 71.2
மயிலாடுதுறை- 67.9
மஞ்சலாறு- 61.2
சீர்காழி- 45.6
தஞ்சாவூர்- 45.5
ஒரத்தநாடு- 44.8
கொள்ளிடம்- 21.6 #Rain #DeltaDistricts

வாஷிங்டன்:

அமெரிக்காவில் மழைக்காலம் தொடங்கி உள்ள நிலையில், அட்லாண்டிக் கடல் பகுதியில் உருவான புளோரன்ஸ் புயல் அமெரிக்காவின் கிழக்கு பகுதியை நோக்கி வந்தது. இந்த புயல் அடுத்த 48 மணி நேரத்தில் அமெரிக்காவை தாக்கும் என்று எச்சரிக்கை விடுக்கப்பட்டது.


இந்த பதற்றமான சூழ்நிலையில், வடக்கு கரோலினாவின் கடலோர பகுதிகளை புளோரன்ஸ் புயல் தாக்கத் தொடங்கியது. கடலோர பகுதிகளில் 100 கிமீ வேகத்தில் கடுமையான காற்று வீசுகிறது. ஆக்ரோஷமாக எழுந்த கடல் அலைகள், கரையோர பகுதிகளை தாக்கியது. இதன் காரணமாக தாழ்வான பகுதிகளில் கடல் நீர் புகுந்தது. புயல் காரணமாக மின்சாரம் துண்டிக்கப்பட்டுள்ளது. இதன் காரணமாக சுமார் 1 லட்சத்து 50 ஆயிரம் மக்கள் பாதிக்கப்பட்டுள்ளனர். காற்றின் வேகம் மற்றும் அலைகளின் தாக்கத்தினால் படகு குழாம்கள் சேதமடைந்துள்ளன.

இந்த புயல் தற்போது வலுவிழந்து முதலாம் வகை புயலாக மாறியிருப்பதாக கணிக்கப்பட்டிருந்தாலும், பொதுமக்கள் மிகுந்த பாதுகாப்புடன் இருக்கும்படி மாநில கவர்னர் அறிவுறுத்தி உள்ளார்.

கடந்த ஆண்டு ஹூஸ்டனில் ஹார்வே புயல் ஏற்படுத்திய தாக்கத்தைப் போன்று இந்த புயலும் பெரிய அளவில் சேதத்தை ஏற்படுத்தும் என அஞ்சப்படுகிறது. #HurricaneFlorence

நாகர்கோவில்:

குமரி மாவட்டத்தில் கடந்த 2 வாரங்களாக தென்மேற்கு பருவமழை தீவிரம் அடைந்து உள்ளது.

கடந்த 2 நாட்களாக மாவட்டம் முழுவதும் மித மிஞ்சிய மழை கொட்டியது. மலை கிராமங்கள், அணைகளின் நீர்பிடிப்பு பகுதிகளில் கொட்டிய மழையால் அணைகளுக்கு நீர்வரத்து அதிகரித்தது. பேச்சிப்பாறை, பெருஞ்சாணி, சிற்றாறு, மாம்பழத்துறையாறு அணைகள் அனைத்தும் நிரம்பும் நிலை ஏற்பட்டது.

தொடர்ந்து பெய்த மழையால் காட்டாறுகளில் வெள்ளம் பெருக்கெடுத்து ஓடியது. சிறு கால்வாய்களில் பெருக்கெடுத்த வெள்ளம் கிராமங்களுக்குள் புகுந்தது.

மழை நீர் கிராமங்களில் புகுந்து சேதத்தை ஏற்படுத்திய நிலையில், ஏற்கனவே நிரம்பி இருந்த குளங்களும், கூடுதல் வெள்ளம் வந்ததால் உடைப்பு ஏற்பட்டது. அதில் இருந்து வெளியேறிய வெள்ளமும் கிராமங்களை சூழ்ந்தது.

இந்த வெள்ளம் வீடுகளுக்குள்ளும் புகுந்தது. இதனால் ஏற்பட்ட பாதிப்பில் இருந்து மக்கள் மீண்டு வர வழியின்றி தவித்தனர்.

இந்த நிலையில் அணைகளுக்கு உபரியாக வந்த தண்ணீரும் திறந்து விடப்பட்டது. பேச்சிப்பாறையில் இருந்து வினாடிக்கு 12 ஆயிரம் கனஅடி தண்ணீரும், பெருஞ்சாணியில் இருந்து 8 ஆயிரம் கனஅடி தண்ணீரும், சிற்றாறு அணைகளில் இருந்து 2 ஆயிரம் கனஅடி தண்ணீரும் ஒரே நேரத்தில் திறந்து விடப்பட்டது.

இது தவிர அணைகளின் பாதுகாப்பு கருதியும், வழக்கமாக திறந்து விடப்படும் தண்ணீரின் அளவு உயர்த்தப்பட்டது. இப்படி ஒரே நேரத்தில் 22,000 கனஅடிக்கும் அதிகமான தண்ணீர் வெளியேற்றப்பட்டது. வழக்கமாக 700 முதல் 1000 கனஅடி தண்ணீர் மட்டுமே வரும் ஆறுகளில் 22,000 கனஅடி தண்ணீர் ஒரே நேரத்தில் பாய்ந்தோடி வந்தது.

பழையாறு, கோதையாறு, பரளியாறு, குழித்துறையாறு என அனைத்து ஆறுகளிலும் பெருக்கெடுத்து வந்த வெள்ளம் ஆற்றங்கரையோர கிராமங்களுக்குள் புகுந்தது.


இக்கிராமங்களை சேர்ந்த 10 ஆயிரத்திற்கும் மேற்பட்ட வீடுகளுக்குள் வெள்ளம் புகுந்தது. இதனால் அங்கு வசித்து வந்த மக்கள் வீட்டை விட்டு வெளியேறினர். இவர்களுக்காக நித்திரவிளை, பூதப்பாண்டி, புதுக்கடை உள்ளிட்ட பகுதிகளில் 12-க்கும் மேற்பட்ட நிவாரண முகாம்கள் ஏற்படுத்தப்பட்டன. இங்கு கிராம மக்கள் அனைவரும் தங்க வைக்கப்பட்டனர்.

குமரி மாவட்டம் மேடும், பள்ளமும் நிறைந்த கிராமங்களை கொண்ட மாவட்டமாகும். இங்குள்ள சாலைகள் பல இடங்களில் தாழ்வாகவும், ஆறுகள், கால்வாய்கள் ஓடும் பகுதிகளில் தரைபாலங்களாகவும் உள்ளது.

தொடர் மழை காரணமாக தாழ்வான சாலைகள், தரை பாலங்கள் வெள்ளத்தில் மூழ்கி உள்ளது. குழித்துறை சப்பாத்து பாலம், கீரிப்பாறை சப்பாத்து பாலம் போன்றவை மழை வெள்ளத்தில் சேதமடைந்தது.

ஆறுகாணி, பத்துகாணி சாலைகள் மழையில் அடித்துச் செல்லப்பட்டது. இதனால் மேற்கு மாவட்டத்தில் பல கிராமங்களுக்கு போக்குவரத்து துண்டிக்கப்பட்டது. மலை கிராமங்களுக்கு பஸ் போக்குவரத்து நிறுத்தப்பட்டுள்ளது.

இரணியல், பள்ளியாடி பகுதியில் ரெயில் தண்டவாளம் அருகே மண் சரிவும் ஏற்பட்டது. இதனால் நாகர்கோவிலில் இருந்து திருவனந்தபுரம் மார்க்கமாக செல்லும் ரெயில் போக்குவரத்து தடைபட்டது.

தண்டவாளத்தில் விழுந்த மண்ணை அகற்றும் பணி நடந்து வருகிறது. இன்றும் சீரமைப்பு பணி நடப்பதால் 10 ரெயில்கள் இன்றும் ரத்து செய்யப்பட்டுள்ளது.

குழித்துறை ஆற்றில் ஓடும் வெள்ளம் தேங்காய்பட்டணம் பகுதியில் கடலில் கலக்கிறது. இப்பகுதியில் மீனவர்களின் கட்டுமரங்கள், வள்ளங்கள், நிறுத்தப்பட்டிருக்கும். நேற்று மழை வெள்ளத்தில் இருந்து கட்டுமரங்களை மீட்க இனயம் புத்தன்துறையைச் சேர்ந்த ஜோசப் சுனில் ஜூலியன் (வயது 27), அவரது சகோதரர் டக்ளஸ் பெவின் (22) ஆகிய இருவரும் பொழி முகம் பகுதிக்கு சென்றனர்.

அப்போது ஆற்றில் வெள்ளம் கரைபுரண்டு வந்தது. இதில் சகோதரர்கள் இருவரும் சிக்கிக் கொண்டனர். அவர்களை வெள்ளம் அடித்துச் சென்றது. தகவல் அறிந்து மீட்புப்படையினர் அங்கு சென்று தேடுதல் வேட்டையில் ஈடுபட்டனர். அவர்களை கண்டுபிடிக்க முடியவில்லை.

எனவே இன்று 2-வது நாளாக அவர்களை தேடும் பணி நடந்து வருகிறது.

குமரி மாவட்டத்தில் தொடர்ந்து மழை பெய்து வருவதால் சுமார் 1000 ஏக்கர் பயிர் நிலங்கள் நீரில் மூழ்கி உள்ளன. ஏராளமான தென்னை மரங்கள், வாழைகளும் நீரில் மூழ்கி கிடக்கிறது. விவசாய பயிர்நிலங்களும் மழையால் பாதிக்கப்பட்டுள்ளது.

இன்று காலையிலும் மாவட்டத்தின் பெரும்பாலான பகுதிகளில் மழை பெய்தது. இதையடுத்து மாவட்டத்தில் உள்ள பள்ளி, கல்லூரிகளுக்கு விடுமுறை விடப்பட்டது.

நிவாரண முகாம்களை மாவட்ட கலெக்டர் பிரசாந்த் வடநேரே, கண்காணிப்பு அதிகாரி ராமச்சந்திரன் மற்றும் வருவாய்த்துறை அதிகாரிகள் சந்தித்து ஆறுதல் கூறினர். அவர்களுக்கு தேவையான அடிப்படை வசதிகளை செய்து கொடுக்கவும் ஏற்பாடு செய்தனர்.

இது தவிர நூற்றுக்கும் மேற்பட்டோர் உறவினர் வீடுகளில் தஞ்சமடைந்தனர். அவர்கள் பத்திரமாக இருக்கும்படி அதிகாரிகள் அறிவுறுத்தினர்.

மாவட்டத்தில் மழை பாதிப்பு குறித்து அதிகாரிகள் ஆய்வு மேற்கொண்டுள்ளனர். மேலும் 2 நாட்களுக்கு குமரி மாவட்டத்தில் கனமழை பெய்யுமென்று வானிலை ஆய்வு மையம் எச்சரிக்கை விடுத்துள்ளது. இதுகுறித்து வருவாய்த்துறை அதிகாரிகள் அவசர ஆலோசனை நடத்தினர்.

மேலும் மாவட்டத்தின் தாழ்வான பகுதிகளில் மீட்புப்படையினர் தயார் நிலையில் இருக்கும்படியும் அறிவுறுத்தப்பட்டுள்ளனர். #Kanyakumarirain #flood